Wasi no vergesse han z verzelle.. Gester Zobig bini mit mim Hostpapi zum „Placita“ gange. Das isch wie en Markthalle mit ganz vil Ständ, wo aber fix dete sind.
Und es gat so richtig südländisch zue und her! A jedem Stand wod verbiilaufsch rüefeds der und wennd der irgendöbbis atreihe 🙂
lg :-*
Wow! Hüt isch en super Tag gsi 😀
Mer hend mit de Schuel en Usflug ines nöchs Dörfli zunere Chile gmacht. Am 7ni am Morge isches losgange mit em Bus. Mer sind öbbe 40 Lüt gsi, mini Klass und d Parallelklass vum Morge. Also ca 25 neui Mönschli zum kennelehre und en neui Umgebig 🙂
Vum Züg womer zeme besproche hend hani fast nüt verstande.. vorallem binere Diskussion bini hoffnigslos verlore gsi..
Aber hey! Ich han super neui Lüt kenneglehrt und en wunderschöne Tag gha 😀
Liebi Grüessli ❤
P.S.: endlich isches au wider schön warm 😀
Sooo mit em Wetter gats zimli steil duruf.. am Wuchenend sötts 30° Grad si 😀 de isch endlich fertig mit früühre!
Zerst hani gmeint die Wuche wird echli lockerer weli jetzt s meiste känne und de Altag langsam iichert. Aber do bini zimli falsch glege!
Obwohli jede Tag es bizli meh Spanisch verstohne und langsam au eifachi Sätz inere vernünftige Ziit herebringe isches glich no schwer. D Argentinier reded wie en Wasserfall! Vor allem di Jugendliche. Mit mer gebed si sich meistens müeh chli langsamer zrede wels jetzt begriffe hend das ich si sust sowiso ned verstohne, aber unterenand.. da chash grad vergesse das meh verstohsch wie nur einzelni Wörter. 😦 vil z schnell und au no immer es paar glichziitig 😛
Gester am Morge het mis Gastmami gseit, dass si am Obig brueflich für zwei Täg uf Buenos Aires muess. De bini schomol liecht überrumplet gsi, aber so blibt s Lebe spannend! 😉
Wege dem hani di letscht Nacht bi mim neue Grossmami gschlofe und die Nacht isch mis zweite Grossmami zu mer id Wohnig cho schlafe.
Zu allem dezue het hüt au no es Meitli vu minere Klass Geburtstag gha, woruf mer sie gester öbbe z 10te am 12i dihei sind go überrasche 🙂
De hütig Obig isch en Spanisch-Prob gsi. Mis zweite Grossmami chan absolut nur Spanish, drum hani gar kei anderi Wahl gha als eifach Spanisch z rede. Und ich bin richtig zfride mit mir! Ich han mich s ganze Znacht dure chöne mit ihre unterhalte ohni Komunikationsproblem 😀
Und jetzt mues au ich go schlofe 🙂 Morn gits en astrengende Tag woni euch de morn verzelle werum!
Pfüüseled guet :-*
Über s Wuchenend isches so richtig grusigs Wetter gsi. Chalt und Rege und vor allem vil Wind. Fascht jede woni troffe ha wo gwüsst het dasi us de Schwiiz chume het mer gseit es seg ja grad Wetter wie i de Schwiiz 😛
Uf jede Fall han ichs scho gschafft mich liecht zverchelte 😦 Dorom hani am Mentig scho s erste Mal gfehlt i de Schuel, aber mer gots zum Glück wider besser.
Hüt hani usegfunde dases absoluts Usnahme-Wetter isch. Es sind di tüfschte Temperature sit Johre gmesse worde. Natürlich genau wenn ich do bin..
Drum: Gnüssed euches schöne Wetter!!!
Trotz em schlechte Wetter hani es schöns Wuchenend gha und mis Gastmami het mer es paar vu ihrne Fründe vorgstellt. Dur das bini einersiits zum Dütschrede cho (isch scho fast komisch gsi) und han mehrfache Winnie-Ersatz gfunde 🙂
Natürlich isch s Winnie besser, aber immerhin es Büsi zum streichle 😀
Ganz liebi Grüessli :-*
so gsehts us wenn ich zu mim Feister useluege *-*
Am Zistig, mim zweite Tag in Argentinie, bini scho s erste Mal id Schuel gange 🙂
D Schueziite sind recht unterschidlich zu dene i de Schwiiz, wel es git en Gruppe mit 30 bis 40 Schüeler i einere Klass am Morge und en Gruppe mit ca 20 am Nomitag. Ich gohne am Nomitag id Schuel, wels denn chli eifacher isch mit weniger Schüeler i einere Klass.
Am Zistig am Morge bini mit em Oscar zeme mini Schueluniform go chaufe und am Nomitag isches denn au scho losgange 🙂
De Oscar het mich id Schuel gfahre und isch au no mit ine cho, damit ich ned ganz verlore gsi bin 😛 Aber scho nach paar Minute sind zwei Meitli cho und hend gseit, dass ich i ihrere Klass bin und dass si mer d Schuel zeiged. (Das hani natürlich erst verstande wo mers der Oscar übersetzt het)
Die zwei, d Constanza und d Maqui, hend mer grad de Pauseplatz zeigt und mer es paar vu de Klass vorgstellt. Uf em Pauseplatz hend mich all agluegt und zum Teil hends mir mega herzig zuegwunke und so Sache 🙂 Denn hets au scho agfange mit de tägliche Begrüessig mit allne Schüeler zeme vu de Schuelleiterin und ich glaube emne Vater unser uf Spanisch.. aber da bini ned ganz sicher 😛
Natürlich het d Schuelleiterin verchünnt dases en neui Schüelerin a de Schuel het wo en Ustusch macht und denn hend mich mal all zeme offiziell chönne astarre.
Im Unterricht selber hani praktisch nüt verstande aber das chunt de schono.. aber es isch vil ungordneter wie i de Schwiiz 🙂 jede staht uf wenn er grad Luscht het oder rüeft ebbis ine oder so ähnlich.
Mini Klass isch meeeega lut aber super 😀
am erste obig..
Am Mentig isch wunderschöns Wetter gsi 🙂 Zum Zmorge bini mit mim Gastmami, de Marta, in Supermärt go esse und han d Stadt s erste Mal bi Tagesliecht gseh *-*
Zum Zmittag hani zum Oscar, mim Gastvater, und sinere Frau döfe go Wienerschnitzel esse. Ich bin glaub no nie so froh gsi drüber, das öbber Englisch het chöne, wel do fascht niemer englisch chan und die wos chönd, nur wenig.
Nachem feine Esse het mer de Oscar d Schuel vu usse zeigt und nocher bini mit de Marta a de Promenade en Spaziergang go mache.
Zum Znacht hets so en feine typisch Argentinische Chueche geh woni leider vergesse han wie er heisst…
Und de isch de ersti Tag au scho verbi gsi und ich bin früeh go schlofe 🙂
Am Samstig Nomitag isches endlich losgange 🙂 ich han mich am Flughafe vu minere Familie und de Linda verabschidet und denn sind zwei anderi Ustuschschüelerinne us de Schwiiz und ich uf euse ersti Flug richtig Paris gange.
Z Paris hemmer es paar Stund Ufenthalt gha und sind denn am 11i uf de grossi Flug mit Buenos Aires als Ziil. I dem Flugi hemmer zum Glück chli chönne schlafe und sind denn nach ca. 13 Stund flüge am Morge am halbi 8i z Buenos Aires glandet.
In Buenos Aires hemmer denn zerst mal dur d Passkontrolle müesse und hend eus denn scho gli vonenand verabschidet wel d Fiona uf de Bus uf Mar del Plata gange isch. D Rebekka und ich hend vum Internationale uf de Nationali Flughafe müese wechsle und sind (obwohl mer de falschi Transfer verwütscht hend) guet acho.
Aber denn isch s Warte erst so richtig losgange. Mer hend über 5 Stund uf de nöchsti Flug müese warte. Es isch eus vorcho wie en Ewigkeit wel mer beid müed gsi sind und liechti Problem gha hend eus z recht zfinde wel eigentlich all nur Spanisch hend chönne. Uf jede Fall hemmers denn irgendwenn gschafft gha und hend eus verabschidet, wel si uf ihre Flug uf Neuquén het müese und ich 1 Stund spöter uf mine nach Posadas.
Churz vorem Start isch d Sunne untergange und ich han i de Luft en wunderschöni sicht uf Buenos Aires im Abigrot gha! Nach anderthalb Stund hani Posadas s erste mal live gseh bi Nacht und bin guet glandet und vu minere Gastfamilie herzlichst Empfange worde 😀
Womer im neue Dihei acho sind han ich mini erste Empanadas gesse und bin denn au scho go pfuuse 😉
sandyinargentina 