Leandro N. Alem

Am Sunntig 22. Dezember bini uf Alem greist. Min Gastvater het mich zum Busterminal in Posadas gfahre und vu det us bini de eleige uf Alem greist. Unterwegs ish de Bus kaputt gange, dorum bini denn mitere gsunde und typisch argentinische Verspötig in Alem acho.

Det het mich de zuekünftig Exchange student vu de Schwiiz erwartet und mir hend de Nomitag zeme verbracht und eus toll unterhalte. Er reist im August für sin ustusch id Schwiiz 😀 drum han ich ihm grad chli vu eusere Kultur und was es heisst exchange student zsi chönne verzelle.

Am spötere Namitag hemmer eus mit de beide Amerikanerinne vu jetzt in Alem im Ustusch sind troffe und en super Ziit gha!

Am obig simmer as traditionelle wiehnachtsfest in Alem (das isch s schönste fest in Misiones). Es isch super schön gsi und ich han mich s erste Mal richtig Wiehnachtsstimmig gfühlt 😀

 

Ich han im Huus vu de einte Amerikaneri döffe übernachte, han de negst Tag mit ihre verbracht und bin denn am Namitg wider heigfahre. (dasmal ohni Panne 😉 )

Konzert in Posadas

Am Sunntig 15. Dezember hets in Posadas es öffentlichs Konzert geh, gsponseret vu de Regierig. 

S Duo Zeze di camargo e luciano sind extra vu Brasilie agreist und hend d Lüt mit ihrere brasilianische Musig begeisteret. In Brasilie sinds anschinend mega bekannt und do hend au di meiste de text mitgsunge 🙂

Wels für all gratis gsi isch hets super vil Lüt gha, aber zum Glück isch alles guet gange 🙂

de hender en ahnig vu was für musig ich rede 😛 

und do wies in Posadas usgseh het

Manon’s Birthday

Am Samstig isches de grad wiiter gange mit em Usgang. D Französin Manon het scho währed de Patagoniereis Geburtstag gha und denn am Samstig es Fäschtli gmacht. 

Wel a dem Obig mini Verwandtschaft us em Innere vu Misiones cho sind, het mini Gastmum mich gfragt öbi vilicht ned grad bi de Manon dihei chönt schlafe, wels erstens kei Platz i de Wohnig meh gha hetti unds zweitens kompliziert gsi wär mit em heicho. 

D Koleginne vu de Manon hend grad no welle id Disco nacher und wel ich grad det gschlafe han isches en luschtige Aruef a mis Gastmami worde, halb info das mer no id disco gönd und halb Frag öbi döf mitgo. Wel si ja ned het chönne nei sege wenn all gönd het si  Ja gseit drum bini scho wider id Disco 😛

S zweite Mal Power 🙂 Alli andere sind scho 18 wo mitcho sind drum isches für sie keis problem gsi zum inecho. Für mich isches chli en Zitterpartie gsi, wel a dem Abig hends au bi de Meitli d Uswiis kontrolliert. Und ich han wider mal bewise wasmer chan erreiche mit Blonde Hoor und em Bonus vude Erschinig vumne Usländische Meitli.

Wo de Typ mich nachem Uswiis gfragt het hani ihn eifach mit grosse Auge agluegt wie wenis ned verstande hät und han ihm denn uf dütsch afoh säge dasi kei Spanisch rede, en aglächlet und dinne bini gsi 😛

Es wird eim s läbe echt eifach gmacht do 😀

Mer hends super guet gha!!

Puerto Laurel

Am Fritig am obig hemmer es treffe mit em Interact gha. De eint het sis Huus zur verfüegig gstellt drum hemmer eus dete troffe und zwei Mitglieder verabschidet. 

Aber das isch eigentli ned de Grund wiso ich das do i min Blogg stelle.. De wahri Grund isch wel das Huus im Bonzeviertel vu Posadas isch. Ich han zerst kei Ahnig gha, hans erst chegget wo mis Gastmami mich heregfahre het und mer voremne riiise Tor aghalte hend und en Maa cho isch und gfragt het zu wem mir wend. Ganz schöne Moment wenn mer denn de Nachname vu sine Kolege ned kennt ^^ aber er het eus trotzdem inegloh weli gseit han dasi zum Treffe vu Interact gohne. 

Denn het de Typ eus also s Tor ufgmacht und mir hend döfe inefahre. Mein Gott die Hüüser det!!!! Eis schöner wies andere, de grossi Pool im Garte isch standard und en eignige Bootsstäg hends au. Drum isch grad s ganze Quartier vu riise Muure umgeh und mer chan nur mit Iladig zum Tor ine. 

S Huus vu dem Koleg isch mega schön! Im europäische Stil baut und mitemne mega schöne Pool im Garte 🙂

Leider hani mini Kamera ned debi gha.. aber das isch echt krass gsi!

Divinamente

Mache grad so en Art Disco-Marathon 😛 eigentli ohni s zwelle. oder segemer ohni s zplane 😉 

Am letschte Donstig bini nemli scho wider inen Disco gange. Dasmal wider en anderi. De Maria ihre Fründ isch nemli de Sohn vumne Discobsitzer. Drum het er eus id Disco vu sim Vater iglade 🙂 Sprich bisch so als VIP i de Disco, muesch kei Itritt zahle, laufsch eifach am Türsteher verbi ohni Alterskontrolle (i dere Disco sinds extrem streng normalerwiis), chasch uf sonen Balkon ufe goh. Als ersts bini natürli grad im Vater vorgstellt worde und denn simer go tanze. Isch mega cool gsi! 

Di andere Lüt det sind eher scho chli älter, d Mehrheit mindistens ü20, defür isch d Musig genial! endlich mal was anderes wie Cumbia 😀

Complejo Power :D

Chum bini us Patagonie zrug gsi isch mis läbe do grad wider mit Vollgas wiitergange! Am Samstig bini nemli id Disco gange. Aber ned nur irgendein Disco! Mer sind  di glückliche und hend di grössti Disco in ganz Latinamerika i eusere Stadt. (100m vu minere Schuel weg :P)

Es isch riiiiiesig!! Unglaublich!! 12 Piste, jedi ihre eignig DJ und wider bizeli anderi Musig. Am Igang kontrollierets eher streng, das heisst es het kei 13 jährigi dinne ^^ das isch no toll, aber jedi anderi Altersklass findet mer glaub det inne.

Ich bin mit mine guete Fründinne Brenda und Maria gange und de Maria ihrem Fründ.

En suuuper tolli Nacht gsi!!

Patagonia!!

Sooo endlich hani ziit alles ufzschribe woni so erläbt han!

D Anreis uf Cordoba: (Dienstag)

Am Zistig am 1 am Nomitag simmer los! Mit hoffentli allem debi womer  bruched simmer z Posadas in  Bus igstige. De ersti Halt isch Corrientes gsi. Det hemmer  öbe 10 wiiteri Exchangers troffe und sind denn uf Cordoba. Insgesamt 20 Stund im Bus.

1. Tag (Mittwoch)

Endlich z Cordoba acho, isches denn erst richtig losgange. Am Busterminal hemmer eus versammlet, insgesamt sicher 90 exchangers! Mer sind scho recht früeh det gsi und hend 4 stund ufenthalt im Busterminal gha, drum simmer chli uf Entdeckigstour gange und hend unterwegs immerwider anderi Exchangers troffe.. isch unglaublich wie sich die vu de Mängi abhebed 😀
Wos de wiitergange isch hend 24 wiiteri Stunde Busfahrt uf eus gwartet.. aber es isch gar ned so schlimm gsi wies jetzt vilicht tönt. Zum Glück het mer ja gnueg z rede und z verzelle!

2. Tag (Donnerstag)

Nach langer Fahrt simmer in Puerto Madryn, es chlises Städtli zmizt im Nirgendwo, acho. Aber mit Meer! S Hotel isch mega herzig gsi und so suber wie mers do selte atrifft. Mer hend endlich chönne go dusche, ich wet echt ned wüsse wie mer gstunke hend.. Am Namitag hemer en Stadtrundfahrt gmacht und sind an Strand go Spaziere. Und zobig denn totmüed is Bett gsunke, endlich wider mal es richtigs Bett!

3. Tag (Freitag)

Mer hend döfe usschlafe und sind de nacher in ersti Nationalpark gange. Peninsula Valdes isch es riese Gebiet, alles Naturgschützt, speziell usgrichtet uf Wal. Zersch simmer ines Museum, denn go zmitagässe, uf en Hügel ufe d Ussicht go gnüsse und denn..  s Highlight vum Tag: Wale watching! Im „Golfo Nuevo“ simer i zwei chlinere Böötli erfolgrich uf Waljagd gange. Am schönste gseh  hemmer es Walmami mit ihrem Junge. Sie sind am spile gsind und hend sich eus wunderschön präsentiert.

 

4. Tag (Samstag)

Am Samstag sind mer denn au no grad Pinguine go aluege! So süessi Viichli sind da! Im „Punta Tombo“ sind ihri Bruetplätz. Das isch de grössti Nationalpark für Magellanic Pinguine. Mer döf sich bis uf 2m a si nöchere und chan  ufemne Wäg zmizt durs Bruetgebiet laufe und gseh debi all paar Meter en Pingu! Und die sind au no all so cool am Pose für d Föteli 😛
Am Obig simmer de au scho wider losgfahre für uf Calafate.

5. Tag (Sonntag)

Samstig Nacht und Suntig bis am Nomitag simer im Bus gsi.Wo mer nach c. 20-stündiger Busfahrt in Calafate acho sind bini überrascht gsi: Das Dorf gseht us wie es Bergdörfli i de Schwiiz! Mit Chaletähnlichem Baustil und allem drum und dra.
Nachemne feine Chinesische Zmittag simer am Lago Argentino go spaziere. Das isch de grössti See in Argentinie. Nach dem schöne Spaziergang hämmer freiziit im Zenntrum gha und det hani schomol en ersti Rundi schöni Souvenirs gshoppet 😀

6. Tag (Montag)

Vu Calafate us simmer uf de bekannte  National Road 40 uf „El Chalten“ gfahre. Unterwägs hemmer es wunderschöns Panorama uf de See gha und vili schöni Täler durchquert. Leider bini totmüed gsi im Bus und han en schöni Rundi pennt anstatt d Ussicht gnosse…
Trotzdem hanis in Chalten gnosse, inmitte vu Berge hani mi gfühlt wie dihei i de Schwiiz!
Uf em Rückweg hemmer imne Museum halt gmacht und eus chli über d Region und speziell uf de Gletscher informiert.
Am obig hemmer Kaiserschmarn gchochet. Und zwar so richtig guete – eusi österrichischi Zimmerkolegin hets echt druf!

7.Tag (Dienstag)

Perito Moreno – so heisst de dritt grössti Gletscher uf de Wält. Und wer het en bestige? Früeh am morge simmer los und denn uf en Gletscher Wanderig vu öbe 3 Stund. Zerscht mit em Boot über de See, denn zum Gletscher gloffe, Stiigise montiert und denn ufem Gletscher umegwanderet! Es wunderschöns erläbnis! Am schluss hends eus sogar no en Whiskey mit Gletscheriis serviert.. ufem Gletscher obe 😛
Am obig simmer inen nightpub chli go tanze.

8. Tag (Mittwoch)

Am halbi 3 i de Nacht simmer losgfahre mit Ziil Ushuaia – die Südlichsti Stadt uf Erde! Unterwägs simer churz uf Chile übere, sprich mir händ a vier Zöll verbi müese (Argentinie usreise, Chile ireise, Chile usreise, Argentinie ireise), was mit ca. 100 lüt zimli lang got. Nocher simmer mit de Fähri uf Füürland übere gfahre, es isch schrecklich gsi.. het so richtig gschauklet
Nachemne lange Tag simer am obig in Ushuaia acho und händ denn so richtig guet gschlafe!

9. Tag (Donnerstag)

Nachemne wohltuende Schlöfli simer in Nationalpark gange und am Nomitag go Shoppe. De Nationalpark isch wunderschön gsi, aber ehrlichgseit gar ned soo speziell. Oder zumindest für Schwiizer ned. Di gschützti Blueme im Park isch Löwezahn und es het Schneeberge rundume. wie i de Schwiiz, nur dases bi eus eifach Löwezahn i jedem Garte het 😛

  

10. Tag (Freitag)

Ufem Programm isch gstande, dass mer Huskys gönd go aluege, d Realität isch aber gsi, dases abgmagereti armi Hünd gsi sind, wo z.T. so usgseh händ wie wenns vilicht es bizeli Husky im Bluet häted. Aber dash au scho alles gsi, es het au settig gha wo usgseh hend wie d Streuner wo do amig so umelaufed.
Am Nomitag hemmer chönne ussueche öb mer en Boatstour wend mache oder wider go shoppe. Ich han mich fürs Shoppe entschide und grad so richtig vil iigchauft 😛
Am obig hemmer feini Dulce de leche brownies bachet für di bevorstehendi grossi Reis. Wel mer nocher no en pizza bachet hend simmer no bis am 2 am Morge am Packe, Lache, Schwätze und Choche gsi. Wel mer all totkaput gsi sind ischs umsolustiger gsi. Und d Pizza isch sogar fein usecho!

11. Tag (Samstag)

Am samstig simmer de ganz tag im Bus gsesse, vum 6 am morge a bis am sunntig am namitag.

12. Tag (Sonntag)

Um di 4i ume simmer in Esquel acho und hend denn Freiziit gha nach dere ewig lange bustour.

13. Tag (Montag)

Am morge simmer nomol inen Nationalpark gange und denn ufbroche in richtig San Carlos de Bariloche – DE Partyort in Argentinie. Geg de abig simmer dete acho und denn au grad in usgang 😀 aber ned inen disco sondern inen night pub wo extra für eus reserviert gsi isch.

14. Tag (DIentag)

De morge hemmer selber döfe gstalte. Mer hend eus am 8i nachere lange nacht zum bett us ghievt und sind id stadt go shoppe. Bariloche isch neb de Discos auno bekannt für sini gueti Schoggi. Undich mues sege: si isch würkli fein. Ad schwiizerschoggi chunt si ned here, aber sisch nöch dra!
Am nami hemmer en usflug zumne ussichtspunkt mit wundershöner sicht uf d Ande gmacht. Nach dem simmer uf en Ranch gange eus doch aunomol körperlich bizeli z betätige. Det hemer verschideni speli gmacht, wie zum bispil en kampf 1 gege 1 mit somne sack mit schafwuhle oder so ähnlichem dinne, oder lianeschwinge über en teich mit chaltem wasser –  es sind paar drigheit ^^. Zum schluss simmer no jede en churzi rundi go riite, dash aber ned soooo toll gsi wel d ross halt druf trainiert worde sind eifach normal zlaufe und z ignoriere was de dödel obe druf macht.
Zum znacht hemmer det en feine Asado gässe und sind denn als überraschig nomol i de night pubgange di letscht nacht vu de reis go fiire. Womer denn scho früeher hend müese heigah wel 2 gchotzet hend hemmer d Party halt eifach uf es zimmer verschobe und hend dete d nacht duregmacht.

 

15. Tag (Mittwoch)

Am Mittwoch am 8i simmer in Bariloche abgfahre, de ganz tag und di ganz nacht im bus gsi und denn am  Donstig am 9ni in Cordoba acho.  DEt hemmer am Busterminal zmorge gesse, gwartet, eus vu vilne verabschidet, zmitaggesse und sind denn am halbi 3 am namitag wiitergfahre mit em Ziel Corrientes. Am halb 4i i de Nacht hemmer in Resistencia halt gmacht und hend de ganz Rest usser d Posadas-family und d Corrientes-lüt dete anbgsetzt und eus verabschidet. Am halbi 6i simer de in Corrientes acho. All totkaput, nach 2 Nächt im Bus. Det hemer die vu corrientes verabschidet und hend de am 9i euse bus uf Posadas gnoh.

Hallelujaaaa! Am Mittag simmer eeeeeendlich in Posadas gsi! Mis Gastmami ish mich am Busterminal cho abhole, ich bin go dusche (ich wet ja echt ned wüsse wie ich gstunke han), mer hend zmittag gesse und ich bin go schlafe und han grad mal bis am 8i zobig gschlafe 😛

 

En wuuuunderschöni, aber au astrengedi Reis isch z änd gange!