Bsuech und en verregneti ersti Nacht vu de Estudiantina

Hahah am Donstig ishes lushtig gsi i de Schuel. Mer sind gnau 10 vu 21 Schüeler gsi.. das bedütet 5 Stund chille und genau nüt schaffe.

Am Fritig hani zerschmal en Schock gha weli gmeint han mer sind nur z zweite ide Schuel!! Zum Glück sind denn doch no 4 Jungs cho, de hemmer halt wider en Nomitag lang chillt und lustigi Sache diskutiert mit de Lehrer.

Am Obig isch denn de Bsuech cho: mini „Cousine“ us Campo Grande (es Dörfli ebbe so gross wie Wohle im Innere vu Misiones). Mit ihre zeme bini d Estudiantina go lueg *.*
Eifach unglaublich!! Das mues mer eifach erlebt ha! D Vorbereitge ebe au, wel nur det gseht mer de riiiiisig Ufwand wo dehinter steckt!
Leider hets nach 4 Schuele afo Regne wie nur ebbis de isch s ganze uf negst Wuchenend verschobe worde.
Drum gits de Föteli und Videos negst Wuche!

Ich wünschti mer hetted so ebbis i de Schwiiz au! Bin jedes mal sprachlos, weni da gsehne *.*

da gsehnder scho mal ein Variante vo Kostüm. Jedi Schuel het anderi, aber all sind selber gnehiet! Jedi einzelni Paillette vu Hand ufgneiht und praktisch s ganze Kostüm isch mit Paillette verziert!

Hüt hani de legendäri Asado gesse. Das isch hauptsächlich grillierts Fleisch mit verschidnige Salöt dezue. Köstlich!
Und das mit de ganze Familie vu mim Gastmami: Grossmueter, zwei Unkel, zwei Tante, vier Cousine und Cousins und zwei Hünd 😛 (vu mer us gseh de Verwandtschaftsgrad)

En wunderschöne Tag!

Bi euch wirds jez de scho Morge und ich gohne jez mal go schlofe.

Es gfallt mer riiiesig! Aber ehr fehled mer trotz allem

Rotaract

Aah genau! Am Mittwuch hani no es Treffe mit Rotaract gha. Das sind d Rotarylüt zwüsche 18 und 30. Aber es het au paar wo 16 und 17ni sind vu dem her ishes easy.

Isch no toll gsi 🙂 wider paar Lütlis meh woni kenne 🙂

s erste mal all „intercambistas“ zeme!

Sodelii.. es ish vil gloffe drum hani fasht kei ziit gha zum de blog wiiterfüehre!

Am letshte Donstig simmer all Ustuschschüeler zeme go znacht esse. Zur Ehr vum Taiwanes ines chinesisches Restaurant. Es isch köstlich gsi!
Und natürli hemmer all Blick uf eus zoge… so 7 komischi Mönschlis wo all paar Sätz d Sproch wechslet
Isch en super Obig
gsi!

Semana del Estudiante

Wow! Han en suuper tolli Wuche erlebt! Wel es isch d „Semana del Estudiante“ gsi. Am Mentig hemmer no ganz normal Schuel gha und am Zistig de Tag dure au.
Aber am 5i hend denn d 7. Klässler (also di ältiste) d Schuel sozäge kaperet. Als Zombies verchleidet hends d Lehrer abgsetzt und Lüt us ihrne eigene Reihe zum Diräkter und so wiiter gkrönt, wie’s Tradition isch. 

Am Mittwuch hemmer es Picknick i de Schuel gmacht mit allne Schüeler zeme – s erste Mal woni all gseh han! Die vu de Parallelklass hend mi grad zunere Party iglade und es isch es tolls Erläbnis gsi. 🙂 Nachem Esse sind die vum Morge heigange und mer vum Nomitag hend zeme Speli gmacht. Alles isch organisiert gsi vu de 7. Klässler und mer hend vil Spass gha. Zwüsched dure hemmer amig es Lied zwei tanzet und denn isches wiiter gange mit de Speli. Jede Sieg isch het müese hert umkämpft werde. Wel di ganz Wuche ish en Wettbewerb unter de Klasse und d Speli sind en sehr grosse Teil devo. 
Bi somne Uflockerigsteil mit Tanze hend di neue Chefe eine nach em andere paar Lüt ufgrüeft wo denn zeme mit ihne hend döfe vor de ganze Schuel es Tänzli uuffüehre. Ich als Ustuschschüeleri bin selbstverständlich Opfer #1 gsi 😛 

Am Donstig isch d „Feria de Platos“ gsi. D Parallelklass vum Morge het mich iglade au a ihri Feria zcho, drum bini de ganz Tag i de Schuel gsi, aber es isch toll gsi! D Feria de Platos isch de ander wichtig Teil vum Wettbewerb. Jedi Klass het es Thema und mues dezue s Schuelzimmer gstalte, sich so chleide und passends Esse mitbringe. D Theme am Morge sind Harry Potter, Charlie und die Schokoladenfabrik, Simpsons, Ich einfach unverbesserlich und Lilo und Stich gsi. Am Nomitag Metropolis on fire, Zirkus, Charlie und die Schokoladenfabrik und vu minere Klass au nomol Harry Potter. 
Es het sooooo vil, sooooooo feini Sache gha do! Und mini Klass.. isch eifach toll, was die alls schaffed! 

Und hüt simmer als Abschluss uf d Stross go Blueme und Gedicht verteile! Leider hets nur einisch Gregnet, ab und zue abeglehrt wie wenns keis Morn gäbt, mengisch nur tröpfelet. Aber mer hends trotzdem guet gha und jetzt kenni wider es paar Mönschli meh 🙂 Aaaah sogar im Radio simmer cho! Zwei hend döffe es Interview mache 😀

Vermisse euch! ❤ ❤ ❤ ❤ ❤

 

tolli Überraschige

Die Wuche isch super gsi! Ich han so vil Fortschritt mit em Spanisch gmacht 😀 ich weiss ned wiso aber es gat eifach plötzli vil besser mit rede 😀 und drum wirds jetzt au immer spannender.. 🙂

Aber s beste isch gsi… Gester woni ufgstande bin het mer mis Gastmami gseit das ich Post übercho hegi.

Es isch en wunderschöne Brief vu mim Gotti gsi 😀 Danke vill mal!! ❤

de strängi Donstig :P

Am Donstig, also gester, hanis sehr streng gha. Am Morge am 7ni hani müese i de Schuel si (aber da muesi jede Zistig und Donstig) für en amüsanti Stund Englisch und nocher Turne. Aber s Englisch isch also uf absolutem Afängerniveau. Ich nime vu jetzt ah glaub selber ebbis mit damit i ned nur umehocke.. aber de Unterricht gfallt mer am beste wels s einzige isch woni würkli chan mitrede 😛

Nachem Turne bini heigange und denn am Namitag wider id Schuel. I de erste Stund hemmer Literatur gha. Aber ich weiss nur, dass di andere es bekannts Buech mit em Titel Martin Fierro lesed, wo vomne Argentinische Schriftsteller isch. Meh weisi ned dezue und dementsprechend sind die Stunde au seeeeehr lehrrich 😛

Aber am Donstig isch nachere viertelstund mini Franz-Lehreri ineplatzt und het gseit si bruchi mich schnell. Min ersti Gedanke isch grad gsi oh neii was hani scho agstellt! O.O
De bini mit ihre usegange und de het si mer verzellt, dass si grad Franzunterricht mit de eis Johr ältere Schüeler het. Und mich denn gfraget öb ich ned würd mitcho und dene chli verzelle. Uf Französisch!! Leider isch mis Französisch im Moment grad miserabel wel ich scho lang kei „richtige“ Unterricht meh gha han und es riise durenand produziert han zwüsche de Spanische und de Französische Wörter.

Natürlich hani trotzdem ja gseit und denn hend di andere mir Frage in Franz, Spanisch oder Englisch gstellt und ich han all döfe beantworte imne Mischmasch us Franz und Spanisch 😛
Aber es sind no spannendi Frage gsi, wie zum Bispil beschrib en Tag i de Schwiiz. Mached das mal! Dash gar ned so eifach.. und chönntshne alles verzelle und si würdeds wahrschindli glaube ^^ oder natürlich Frage übers Esse. Was sind di typische Gricht? Chasch Fondue choche? Was isch Raclette? und denn no di ganz tolle Frage vu Wie isches so im Usgang? und di eint Frag wo meistens irgendwenn chunt Hesch en Fründ? 😛

Es isch en super Stund gsi! Und jez kenni wider paar meh Schüeler vu de Schuel 😀

Zobig bini direkt vu de Schuel is Basketball gange det go schnuppere. Isch no guet gsi, bin mer aber ned so sicher wie lang ichs wird durezieh, wel es sind all 1 bis 2 Jahr jünger und han jez ned s Gfühl, dass da mini beste Kollege werded..

Nachem Basketball bini heigloffe, go dusche und denn au scho wider mit de Olivia (USA), de Manon Frankrich), em Jordan (Holland), de Brenda (es Meitli vu do wo glaub negschts Jahr in Ustusch got und woni drum vum Facebook kenne), und es paar vu ihrne Kollege do usegange. Es isch sozäge en Kulturetreff gsi. Di ganz Ziit d Sprach gwechslet. Immer so halbe Spanisch vermischt mit Englisch, Franz und Dütsch. Füehred mal sones Gspröch, de wüsseder nocher was euches Ghirn alls chan leiste!

Und nach all dem vile coole Züg bini am Obig totmüed is Bett gheit 🙂

 

 

 

Chor

Am Zistig Obig bini inen Chor go schnuppere. Aber ich han mich scho entschide ned zgo. Wel es isch de Chor vu de Univeresität und es sind all öbbe 25, drum isches chli komisch und d Musig gfallt mer ned so. 
Drum lohni s singe halt sii für es Johr und singe halt nur chli dihei für mich. Dasch au  schön 🙂

 

Rotary Meeting

Am Mentig Obig isch s erste Rotary Meeting gsi. De ganz Rotaryclub „Posadas Norte“ het sich imne Hotel zum Znacht troffe. Im Mittelpunkt vum Obig sind natürlich mer Ustuschschüeler gsi 🙂 Zeme mit mir werded no zwei anderi Schüeler vu dem Rotaryclub gsponseret, di andere 4 Schüeler werded vum Rotaryclub „Posadas Oeste“ gsponseret. 

Mit mir zeme im Club sind es Meitli vu Dütschland (han leider ihre Name vergesse) und de Jordan, en Bueb us Holland. S Meitli isch en Überraschig gsi, well ich ned gwüsst han das si do isch. Mit em Jordan hani scho über Facebook Kontakt gha, au wenns chli lustig isch wel ich immer mit ihm uf Englisch gschribe han und fang am Mentig usegfunde ha daser flüssend Dütsch redt 😛

Di 4 andere sind 3 Meitli und ein Bueb. D Olivia isch us de USA, scho en Monet do und redt sicher am beste Spanisch vu allne, wel si fast zweisprachig ufgwachse isch (ihre Vater isch Mexikaner). Di andere zwei sind beid Europäerinne, d Manon us Frankrich und d Rabea au us Dütschland. De Bueb isch usem Taiwan!! Zum Glück chan er sehr guet Englisch und so chumi doch no es chlises Stückli vu de taiwanesische Kultur mitüber 😀

Nachem feine Esse hemmer eus müese vorstelle – natürlich uf Spanisch – und all hend immer Klatschet. Zu minere Freud chan ich glaub scho am beste Spanisch vu eus 3ne 😛

D Rotarier sind all mega nett und hend eus herzlichst willkomme gheisse 🙂

Paradies uf Erde

Am Sunntig hani mit mim Gastmami en Usflug zum Feriehuus vonere guete Fründin vu ihre gmacht.

Es isch öbbe en Halbstund mit em Auto em Paraná (dash de Fluss do) entlang. Relativ abglege, aber

ich bin no nie am ne so schöne Ort gsi!! *-*

 

Und det hani de s erste Mal „Mate“ trunke.

D Nachbere hend sogar es chlises Pony!

Das isch d Lisa 🙂 de Hund vu de Bsitzeri vum Huus

 

liebi Grüessli :*

Konzert

so endlich hani wider mal ziit ebbis zshriibe 🙂

Am letste Friitig Obig hend mich min Gastvater und sini Lebespartneri mitgnoh anes Konzert vu de „los hermanos Nuñez“. Das sind zwei Musiker vu de Umgebig wo suuper Akkordeon und Gitarre spiled. Aber si hend au no ihre Vater (Akkordeon), en geniale Schlagzüger, en Bassist, drü Sänger und es Tanzpaar mitbrocht. De Musigstil isch so Volksmusig gsi wo all kennt hend (usser natürlich ich 😛 ). Es isch eifach super gsi! 😀

Nachem Konzert simmer no zeme go Znacht esse. Am 12i! Bin fascht igschlofe bim Esse, aber mini erste Pommes do sind mega fein gsi 😀

Am Samstig hani mich mit de Lüt vu minere Klass troffe und mer hend en super Obig gha 😀