so.. ich bin leider zimli in verzögerig grate mit em blogschriibe aber ich versuech jez das alles wider ufzhole. müend nur chli geduld ha!

ich han so vill geniali sache erläbt dases mer chli schwerfallt alles ufzschriiibe ohni irgendebbis z vergässe.aber da chunt de schono!

Rückkehr und Familiewechsel

Am Fritig 31. Januar simmer nachere zimli astrengende Rückreis am Morge früeh in Posadas acho. S isch vu Saõ Paulo über Rio de Janeiro uf Foz de Iguazu und denn vu det us mit em Nachtbus zrug. Scho währed de ganze Rückreis isch ned ganz klar gsi i wele familie das ich go söll.

Wel währed minere super Reis in Brasilie isch s totale Chaos i mim Rotary Club usbroche. Di ander ustuschschüeleri het gstohle. D Marta (mis erste Gastmami) het sie iglade uf Uruguay id Ferie. Sie sind id Villa vunere Cousine vu de Marta gange. (sogar de Sean Connery isch det mal z bsuech gsi) Und det hed di ander afo stehle.
Denn isch de wo eigentlich verantwortllech für d Ustuschschüeler wär us em Club usträte und denn het erst recht niemert meh gwüsst was mache. Am Endi het mer denn ufteckt,  dass di ander a Kleptomanie lidet und sie isch natürli sofort heigschickt worde.
Minere eigentliche zweite Gastfamilie isch gseit worde, dass sie niemer meh müend ufnäh, au wenn sie mich gern ufgnoh hätted. Somit isch mini zweiti Familie usem Spil gsi, aber kein neui debi. Mer hends gseit ich würd zu de Marta zruggoh und dete bis am Endi vu mim Ustusch blibe. Das hetti mer gar ned passt, wel ich mich so fest uf Gastgschwüsterti gfreut han.

Ich bin denn zerst doch mal zu dere zweite familie gange und det hemmer alles organisiert. Di erst Version het so usgseh: ich wechsle no am gliiche Tag is Huus vonere Rotarierin (en älteri dame) und denn am mentig zum Oscar (min ersti Gastpapi).
Das het sich denn grad scho mal gänderet wel mini zweiti Familie mich iglade het mit ihne s Wuchenend in Eldorado, enere Kolonie vu Schwiizer und Dütsche im Interior vu Misiones, zverbringe, well si det Verwandti hend. Die Iladig han ich natürli liebend gern agnoh.
Also hani en tolli und interessanti Ziit in Eldorado verbracht! Und am sunntig mittag hani denn es sms übercho wo drin gstande isch, das si en anderi Familie gfunde hend und ich no am Abig is Huus vu de Counsellerin vum andere Rotary Club ziehne und denn am Donstig zu de neue Familie.

Das isch tatsächlich so abgloffe. Die Familie hend mi super empfange und ich han  mi vum erste moment ah bi ihne wohlgfühlt. am Abig hani mit minere zukünftige neue gastschwöster afo schriibe und bin super glücklich gsi. Nur ish denn am Mentig morge woni ufgstande bi d meldig cho, dass si jez en aaanderi neui gastfamilie gfunde hend und ich zu dene gohne. Guet ok bin trurig gsi, han s aber akzeptiert und mi uf di neu situation igstellt.
Die familie het au en tochter im gliiche alter, vudem her hanis ok gfunde und au mit ihre afo schriibe.

Denn am Zistig abig sind di beide zuständige vum rotary cho um mir das ganze z „erchläre“, was aber en zimliche reinfall gsi isch wells mer alles erchlaärt hend, nur de teil ned werum ich jez gnau kei familie meh han. aber egal. mini wichtigsti frag isch gsi öbs jez eeeeendli sicher isch, so wies isch. all hend gseit ja klar, ich bin mer aber ned so sicher gsi bi dere sach.

Am mittwuch hets echt so usgheh gha wie wenns jez feststöchi. Ich bin am nami zu de Rabea (dütschi ustuschschüeleri in posadas) und mer hend welle en schöne namitag zeme verbringe. chum bini 10 minute bi ihre gsi het mis handy glütet: de zueständigi vu mim rotary club, wo mer doch ernsthaft het welle verchaufe dass jez doch wider alles gänderet het. und dasmal isches di drastishsti änderig gsi vu allne. Er het nemli welle, dass de Jordan (holländische ustuschschüeler in posadas) zu de Marta wechslet und ich id familie vum Jordan (det woni 10täg vor brasilie verbracht han). und das sho am nöchste tag.
ich bin komplett usgrastet und has grad no so gschaft de typ ned azschreie am telefon. Wel ich han gwüsst dases im Jordan super gfallt i sinere familie und han ned welle das si jez auno afanged ihnumezshupse und vu huus zu huuus z jage.

drum hani im Jordan grad aglüte. de het no nix vu dem ganze gwüsst gha und isch us allne wolke gheit. zemme hemmer denn beschlosse dases so ned chan wiitergo und mer am Jorge Perez montalvo alütet, em chef vum ganze distrikt. Das han ich denn au grad gmacht und de isch suuuper lieb und top informiert gsi. i hanem d situation ned mal müese erkläre, er het mer fast sofort gseit das er eus verstöchi und dass de jordan i sinere familie sell bliibe ich jez ussueche döfi i weli familie ich möchti. also hani di ersti neui familie usgsuecht.

Am nöchste tag hani denn au scho grad gwechslet und sie sind mich geg de abig i mim provisorische huus cho abhole und hend mich super empfange!

Das isch di besti entscheidig gsi vu mim lebe!!! d Familie isch geniaaaaaaaaal und ich fühle mich pudelwohl und bliibe do bis zum endi vum ustusch! 😀

Jetzt ich nochhinein isch das ganze drama s beste wo mer hetti chönne passiere, wels mich zu dere Familie brocht het.