Am Zistig hani mit minere Franzlehreri döfe en anderi Schuel go bsueche. Si git dete au Französisch und het mich gfraget öb ich ned Lust hetti mal mitzcho und mit de Schüeler det chli zrede. Ich bin natürlich begeisteret gsi! Das isch en perfekti Glegeheit zum Lüt kennezlehre und au Spanisch züebe.
Also bini am Zistig am Morge a di öffentlichi Schuel „Normal“. Mini Lehreri het mich vorem Huus abholt und mer scho uf em Weg gseit, dass si gspannt segi wie di andere uf mich reagiere würded. I dem Moment hani mer nüt wiiter zu dem denkt gha, aber im nochhinein weisi jetzt ganz gnau werum si da gseit het.
Die Chind wo im Normal id Schuel gönd, hends vil ned so guet. All wo det id Schuel gönd müend nüt zahle, sprich Chind vu de Mittelschicht und drunter det here.
Womer i de Schuel acho sind isch scho mal zimli ungwohnt gsi, wel mich niemert beachtet het. Tönt jetzt blöd, aber ich bin mers scho gwöhnt, dass mich vil alueged. Denn bini mit is Lehrerzimmer und han det chli mit de andere Lehrer gredt und denn het de au scho gli di erst Schuelstund agfange 🙂
Di erst Klass isch glich alt gsi wie ich. Es hend all gwüsst das ich chume und si sind glaub au all zimli neugierig gsi. Woni in Ruum inecho bin hend mi mal all agluegt. Aber si hend mich komplet andersch agluegt wie di andere Mensche do. Meistens lueged d Lüt eifach us Interesse, wels halt wüssed dasi en Ustuschschüeleri bin. Aber die Schüeler hend mich eher agluegt wie wenn ich usere andere Welt chämt. Was für vili vu ihne au d Wahrheit isch!!
Di erste foif Minute sinds recht komisch gsi und hend ned so recht gwüsst was afange mit mir. Wel nachdem ich mich churz Vorgstellt han, isch ihri Ufgab gsi, mer Frage zstelle. Es tönt jetzt krass, aber mini Lehreri het ihne müese erchläre, dass ich au en Mönsch bin, gnau glich wie sie au. Und sobalds da chegget hend, hemmer en super Ziit zeme verbracht! 😀
Di zweit Klass woni bsuecht han sind 13 gsi. Die sind mega herzig gsi, hend aber glich reagiert wie di erste, s isch aber scho bizli weniger krass gsi. hahah und di erst Frag wo en Bueb gstellt het isch gsi: „Sind all Meitli i de Schwiiz so hübsch wie du?“ 😀
Und d Meitli hend ganz grossi Auge gmacht woni vum Pascal verzellt han. Chum hends ghört daser au 13ni isch, blondi Haar und blaue Auge het sinds hin und weg gsi und en grad im Facebook go sueche.
I de Pause sind de scho en Horde anderi Schüeler mich go belagere und frage öbs Föteli döfed mache. Bin scho berüehmt gsi 😉
D Schüeler vu de dritte Klass sind ca. 15ni gsi. Die hend am schnellste chegget dasi keis Alien bin 😛 und weli scho s dritte mal meh oder weniger s gliche am Verzelle gsi bin isches au für mich eifacher gsi, au weni scho totmüed gsi bin!
Ich han no nie so spannendi Erfahrige mit andere Mensche gmacht wie a dem Tag!!
Und jetzt spaamed mich all im Facebook zue 😛