Geburiiiiiii

D Nici het bi mer übernachdet und mer hend de ganz Tag zeme verbracht!

Ich han ihre Posadas zeigt, mer hend vil gshoppet, de Pool i mim Garte gnosse und no meh gshoppet 😉

Für de Abig hemmer es Znacht inere Pizzeria mit de Exchangers organisiert und ich han denn mis Gastmami ganz schüch gfrogt öb mer id Disco döfed. Zu minere riiiiese überraschig het sie ganz gechillt gseit „Wie chönt ich au nei sege wenns din Geburi isch?“

Drum hani paar Fründe zemetrummlet und mer sind id Disco go fiire!

En wuuuuunderschöne Tag und eine vu de beste Geburtstäg vu mim Läbe! endlich mal im Summer..!!

Träffe mit de Intercambistas

Chum simmer us de Chacra heicho isch en supergueti Kolegin us Dütschland uf Bsuech cho 😀 Sie wohnt sit churzem in Encarnacion, de Nachbarstadt in Paraguay. 

Mit de NIci zeme bini anes Träffe mit allne Exchangers vu Posadas. JEde het es Speziells Esse vu sim Heimatland mitgnoh. De hemmer nomol zeme chli wiehnachte gfiiret und eusi feine Sache gmampfet 😀

Mini süessi „Posadas-Family“ het sogar en Chueche mit Cherzli und emne lutstarche „que los cumplas feliz“ organisiert und mer hend uf min Geburi agstosse! Das ish absolut unerwartet und dorom umso schöner gsi 😀

Eine vu de beste Öbig!!

Chacra

Zur Info: Chacra übersetzt heisst Buurehof oder Farm. 

Mini „Feriefamilie“ het en Cachra. Aber ned mit chüeh oder so. DAs isch es riiiiiesigs grundstück (24ha) mit reinster Wildniss. Wunderschönster Wildniss wie Wald und Flüssli und grusige Fiicher drinn 😛 det findet mer alles! Vu ecklige KAckerlacke (die gits leider au in Posadas), „Chicharas“, tuuusige insekti, bis zu giftige Vipere und Tarantle. 
ZUm Glück hani weder en Schlange no en Spinne gseh! 

Am 26. simmer id Chacra und hend dete een wunderbar sunnige und heisse Tag verbracht und sind am Obig uf Oberá gange, wel dete d eltere vu mim Gastmami wohned. I dene ihrem huus hemmer gschlofe und sind denn am negste tag nomol id Chacra und denn hei. 

Familiewechsel

Am 25. Dezember isch de ersti Familiewechsel bevorgstande. Leider chli es unschöns Datum, isch aber ned andersch gange. 

Also zerst mal d Vorgschicht:
Am 16. Dezember het euse tooooolli Rotaryclub fang bekannt geh dass mer Familie zwüsche Wiehnacht und Neujohr wechsled. Ehr gsend: Argentinischi Organisation. Guet also wechslemer Familie i dere Ziitspanni. Jetzt chunt s Problem: mini früehneri Gastmueter gat am 28. uf Uruguay, sprich ich mues vorher wechsle, well sie spöter als de 7. Januar wider zrugchunt, was de Start vu minere Brasiliereis isch. Zum s Drama zverfolständige gat mini 2. Familie au id Ferie und chunt au spöter zrug. -> Sandra staht ohni Huus do. Schöne Moment. 

Zum Glück hemmer en gueti Lösig gfunde und ich han 10 Täg mit minere 3. Familie verbracht 😀

Zu dere Familie: es het mer gar ned passt dasi do here han müesse go. Wel die Ustuschschüeleri wo vor mer do gsi isch het nie use döffe. und i dene 10 Täg sind doch min Geburi und Neujahr dinne gsi. Aber es het mer suuuuuuuuper gfalle!!!! Und usedöffe hani au 😉 mini Statistik: i 10 Täg 3 mal in Usgang. 😛

de ersti Satz vu minere neue Gastmami isch gsi: Aaah so schöööön das du Spanisch redsch!! (di anderi chan fast nüt) Und s Huus voll Lüt: d Gasteltere, en Gastbrüeder (22), und zwei Gastschwöstere (27 & 24). Di beide Mädels sind aber leider nur über d Ferie do. Ich hans super mit allne gha! und zu dene vile Lüt au no 3 Hünd und en Chatz 😀

Argentinischi Wiehnachte

Unglaublich wie die Ziit raast!! Es isch scho Wiehnachte gsi!!

Min Wiehnachtstag isch jetzt ned grad de best Tag vu dem Johr gsi. Ich han euch alli zimli fest vermisst und zu allem dezue hani au no alles mis Züg müese packe, wel de Familiewechsel churz bevorgstande isch 😦

so schlecht de Tag au gsi isch, de Obig hani mega gnosse!

ich han mit mim Gastvater Oscar, sinere neue Frau, dere ihrem Brüeder mit sinere Familie (die hani vorher no nie gseh gha) und mim Gastbrüeder Alex, woni fang 4 Täg kennt han, Wiehnachte gfiiret. Tönt chli komisch, aber mer hends mega schön gha und ich has riiiiesig gnosse.

Zerstmal zu de Traditione im Allgemeine: In Argentinie fiiret mer eigentli de 25. Dezember als Wiehnachte. Aber mer verastaltet es riesigs Esse am 24. am Obig und wartet denn zeme eigentli bis am 12i wo denn d Wiehnacht afangt und mer astosst. De Obig heisst „noche buena“ (gueti Nacht). Also um Mitternacht stosst mer denn ah, d Gschenkli werded verteilt, es git Füürwärch und normalerwiis gat mer denn in Usgang.

Und so hets au bi eus usgseh;

Mer hend es riesigs Buffet mit ganz verschidnigem typisch argentinischem Esse gha, all hend meh oder weniger tüf is Bier oder Wiiglas gluegt, aber all sind recht lustig druf gsi, mer hend agstosse, sind s Füürwärch go luege und hend Gschenkli verteilt. 

Ich han frischfröhlich alles welle probiere wo’s am Buffet geh het und han da au gmacht. Zu mim grosse Schrecke het mer denn irgendwer gseit, chum hani mer es Stückli Fleisch uf de Teller glade gha, dass da Chuehzunge seg. 
Min Gsichtsusdruck mues einmalig gsi si.. all hend über mini Reaktion glachet 😀
En Tip: Chuehzunge tönt zimli grusig zum Ässe und das isches au. es isch zimli gummig und scho nur bi de vorstellig was du grad im Muul hesh … wääääh

Egal, ich han mich durekämpft. Neui erfahrige ghöred ja schliesslich dezue! Aber nach dem hani immer gfraget was das da züg gnau isch!!

Und s Fazit vu argentinische Wiehnachte: ich glaub de grössti Teil vu de Bevölkerig endet atrunke oder bsoffe. 😛